Чÿк уйăхĕн 26 – мĕшĕ – Чăваш тĕррин кунĕ. Старший лейтенант ФСБ России А.Н.Николаев ячĕпе хисепленекен Кĕтеснерти пĕтĕмĕшле пĕлÿ паракан шкулта тĕрĕ ăстисен ĕçĕсен выставкине йĕркелес терĕç. Ку ĕçе чăваш чĕлхипе литературине вĕрентекен Николаева Л.Ю. пуçарчĕ. Вĕренекенсем килте хăйсен асламăшĕсен, кукамайĕсен арчисене уçрĕс. Чăн та, епле пуян иккен асанне-кукамайсен арчи! Кунта питшăлли, сăмса тутри, тутăр, кĕпе, минтер пичĕ, кавир…Чăваш хĕрарăмĕн тирпейлĕхĕ, ĕçченлĕхĕ куç кĕрет. Арчара урăх йышши алă ĕçĕсем те йышлă. çыхнă япаласем: алса, нуски, кофта, калпак… Анчах ачасене ку хутĕнче тĕрĕсем илĕртрĕç. Вĕсем тĕрĕсене шкула илсе килме васкарĕç. Хăйсен асламăшĕсен, кукамайĕсен  ĕçĕсемпе мăнаçланас терĕç пулас.

              Выставка Аннесен кунĕ умĕн уçăлчĕ. Шкулта 21- мĕш ноябрьте ашшĕ-амăшĕсен пухăвĕ иртрĕ, çавăнпа выставкăри ĕçсене курса киленекенсен йышĕ пысăк пулчĕ. Выставка эрне тăршшĕпех ачасемпе вĕрентекенсене савăнтарчĕ.

              Тавах, ылтăн алăллă хĕр арăмсене, пире юмах тĕнчинче пулса курма май туса панăшăн. Пир çине çипсемпе эрешленĕ ÿкерчĕксем пурне те тыткăнларĕç.

               Н.Николаева вĕрентекен 4-мĕш класра вĕренекенсемпе выставкăри ĕçсемпе уса курса калаçу ирттерчĕ. Вăл уйрăмах рама ăшĕнчи тĕрĕсем патĕнче  чарăнса тăчĕ. ( Ку выставкăра унăн амăшĕн, Константинова Нина Сергеевнăн, тĕррисем те пур). Тĕрĕсем стена çинче çакăнса тăрса кил- çурта илемлетнĕ. çак калаçу хыççăн, ачасен хăйсен те тĕрĕ тĕрлеме вĕренес шухăш çуралчĕ. Алă ĕçĕ тума пĕлни пурнăçра питĕ кирлĕ.