Шăпа кỷнě професси.

                                                              Вěрентекен… сăваплă сирěн ят! 

                                                              Парсамăр ирěк пуçăма таймашкăн.

                                                              Эсир чěртейнě чěремри кăвар,

                                                              Çук, чарăнмě нихçан та ялкăшмашкăн.

                                                                                                       П.Михайлов.   

   Çак сăвă йěркисем  Кěтеснерти тулли мар шкулта 29 çул хушши вăй хуракан  М.В.Краснова пиркиех тесен те йăнăш пулмě.    

   Канашри педагогика училищине вěренсе пěтернě хыççăн шăпи тăван яла илсе çитерет.  Кěçěн класри  ачасене пěлỷ тата воспитани парас ěçре вăй хурать,  çав вăхăтрах И.Н.Ульянов  ячěллě Чăваш патшалăх университетěнче историпе филологи факультетěнче  куçăм мар майпа пěлěвне ỷстерет. Унтан шкулта историпе географи предметне вěрентме тытăнать. Директорăн воспитани енěпе ěçлекен заместителěнче  пысăк яваплăха  туйса тăрăшать. 2003 çултанпа  Кěтеснер шкулěн коллективне ертсе пырать.  

      Хастар та пултаруллă  педагог вěрентỷри çěнě хум варкăшăвне  пурнăçа  кěртме тăрăшать. Историпе право урокěсем тěрлě енлěхěпе уйрăлса тăраççě.  Унăн вěренекенěсем районта иртекен  конкурсенче  малтисен ретěнче. Кăçалхи вěренỷ çулěнче 9-мěш класра вěренекен  Сергеева Маргарита право  предмечěпе 1-мěш вырăна тивěçрě.

            Вěрентекен аслă пěлỷ, диплом илнě çын тенине кăна пěлтермест. Учитель профессине  кирек кам та алла илме пултарсан та унран мěнле специалист  пуласси  пěлỷрен мар, çынран  хăйěнчен  килет. Маргарита Вячеславовнăн  амăшě  те, Екатерина Дмитриевна математика вěрентекенě пулнă  май, ачасене сасă  хăпартмасăр, ятламасăр итлеттерме, вěсен кăмăлне уçма пултарнă.  Унăн хěрě  амăшне хывнă та ěнтě. Кашнинех ăнланма, кирлě сěнỷ-канаш парса лăплантарма пěлет. Тепěр чух çывăх çыннисем парса çитереймен чун ăшшине те пама тăрăшать. Ашшě-амăш  вырăнне çирěппěн асăрхаттарма, ятлама та пултарать ăста педагог.   

      Ырă кăмăлěшěн, çынна ăнланнишěн  хисеплеççě ăна ěçтешěсемпе вěренекенěсем. Паянхи кун та Маргарита Вячеславовнăна вěренекенěсем тав сăмахě калаççě, салам çырăвěсем  яраççě.  Тăван ял-йыш, ачасен ашшě-амăшěсем  умěнче те сумлă çын  Маргарита Вячеславовна.  

    Юратнă мăшăрěпе, Виталий Вячеславовичпа,  икě хěр çитěнтереççě. Аслă хěрě Татьяна - Тольятти хула сучěн судья çумě пулса ěçлет, кěçěн хěрě шкулта вěренет.

 Маргарита Вячеславовна – Чăваш Республикин тата Раççей Федерацийěн тава тивěçлě учителě.